Իսպանիայից փոստով Հայաստան էր ներմուծվել կոկաին

Պետական եկամուտների կոմիտեի մաքսանենգության դեմ պայքարի վարչության աշխատակիցները, Էլեկտրոնային առևտրի և օդային տրանսպորտով իրականացվող փոխադրումների վարչության հետ համատեղ, մաքսային զննման են ենթարկել «Հայփոստ» ՓԲ ընկերության միջոցով Իսպանիայի թագավորությունից Հայաստան ներմուծված երկու առաքանի։

Զննման արդյունքում կենդանիների համար նախատեսված ներքնակներից հայտնաբերվել են պոլիէթիլենային տոպրակներ՝ համապատասխանաբար 178 և 250 գրամ քաշով, որոնք լցված են եղել «կոկաին» տեսակի թմրամիջոցներով։

Փաստի առթիվ նախաձեռնվել են քրեական վարույթներ։ Ձերբակալված անձինք ներկայացվել են Քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ ՀՀ քրեական օրենսգրքի 393-րդ և 399-րդ հոդվածների հատկանիշներով վերջիններս ձերբակալվել են։