Բարեկամների միջև փոխանցումների վրա 300 հազար դրամի սահմանաչափ կդրվի. Թունյանը՝ հայտարարագրման մասին

Եկամուտների հայտարարագրման համակարգում փոփոխություններ անելու նախագծի քննարկման ժամանակ «Հայաստան» խմբակցության պատգամավոր Արման Ղազարյանը հետաքրքրվեց, եթե մարդը ՌԴ-ում խնայած միջոցներից 320 հազար դրամին համարժեք ռուսական ռուբլի է փոխանցում իր քրոջը կամ իր տատին, պապին, կոնկրետ այս դեպքում նոյեմբերի 1-ից գործող օրենսդրական փոփոխությամբ այդ գումարները հայտարարագրման ենթակա լինելո՞ւ են, թե՞ ոչ:

«Քաղաքացիական պայմանագիր» խմբակցության պատգամավոր Բաբկեն Թունյանը պարզաբանեց. «Ընտանիքի անդամներից դուրս՝ բարեկամների միջև՝ հորաքույր, մորաքույր, ընկերոջ հորաքույր, այդ տիպի փոխանցումների վրա ՊԵԿ-ի առաջարկությամբ սահմանաչափ է դրված: Այդ պահին 300 հազար դրամ է,- ասաց նա և հավելեց,- հիմնական շահարկումը եկամուտները հարկելու վերաբերյալ էր, ու այստեղ ուզում եմ նշել, որ այդ եկամուտները հարկման ենթակա չեն, չեն եղել և չեն լինելու»:

Հիշեցնենք, որ Ազգային ժողովի արտահերթի նիստի շրջանակում առաջին ընթերցմամբ քննարկվում է ՀՀ քաղաքացիների, ֆիզիկական անձանց եկամուտների տարեկան հայտարարագիրը լրացնելիս համակարգում նախատեսվող փոփոխություններ կատարելու նախագիծը: Ըստ այդմ՝ որոշվել է, որ ընտանիքի անդամների միջև դրամական փոխանցումները հայտարարագրման ենթակա չեն: Ընտանիքի անդամների միջև փոխանցումները հիմնականում նվազեցվող եկամուտներն են, այսինքն՝ հարկման ենթակա չեն, ուստի ծնողի և երեխայի, քույրերի և եղբայրների, ամուսինների միջև դրամական փոխանցումները հայտարարագրելու կարիք չկա. խոսքը վերաբերում է չհարկվող եկամուտներին: