Սահմանին զինվոր չի զnhվում. ընդդիմությունը դժբախտ է, ձեռքերը փրփուրներից են գցել. Փաշինյան
Իմ գնահատականն այն է, որ Հայաստանի Հանրապետության և Ադրբեջանի միջև Ադրբեջանի Հանրապետության միջև խաղաղություն է հաստատվել օգոստոսի 8-ին, ընդդիմությունը 9-ին, 10-ին, 11-ին, 12-ին դեռ հլը շոկի մեջ էր, 13-ից սկսել է լայնածավալ հարձակումը խաղաղության դեմ։ Այս մասին լրագրողների հետ ճեպազրույցում հայտարարել է ՀՀ վարչապետ Նիկոլ Փաշինյանը:
«Ո՞նց անենք, որ ձախողենք, տապալենք, ո՞նց անենք, որ նոր էսկալացիա լինի, բա այս ո՞նց կլինի։ Դժբախտ է մեր ընդդիմությունը, որովհետև սահմանին զինվոր չի զոհվում, հասկանո՞ւմ եք։ Չի զոհվում, և դրանից նրանք դժբախտ են, բա ո՞նց կլինի, որ սահմանին զինվոր չզոհվի, բա մենք ինչի՞ հաշվին ապրենք, բա ո՞ւմ արյունը խմենք, որ ապրենք»,- նշել է Փաշինյանը:
Նրա խոսքով՝ իր պարտքն է համարում պաշտպանել հաստատված խաղաղությունը:
«Դրա ձևը հնարավորինս շատ հաղորդակցության մեջ լինել Հայաստանի քաղաքացիների հետ: Այդ խաղաղության հեղինակը ես չեմ, այդ խաղաղության հեղինակը ՀՀ քաղաքացիներն են, որոնք 2018 թվականի մայիսից ամենօրյա ռեժիմով հիբրիդային քարոզչական հարձակումների ներքո են: Բայց մեր ժողովուրդն առավել քան դիմակայուն է: Ես ուզում եմ ժողովրդին շնորհակալություն հայտնել այս խաղաղության համար, իրենք վաստակել են խաղաղությունը:
Նրանք դժբախտ են, քանի որ տնտեսությունը չի փլուզվում: Ամեն օր արտահանումը, տնտեսությունը, ֆինանսական աշխատավարձերն աճում են: Խաղաղությունը հաստատված է, մենք էլ մտել ենք նախկինում Հայաստանում իշխանությունը բռնազավթած քաղաքական խմբակների վերջնական ոչնչացման, քաղաքական ոչնչացման փուլ, իսկ նրանք ձեռքերը փրփուրներից են գցել: Ես այս ասուլիսներում նաև փրփուրներից եմ ազատում ջրավազանի երեսը, որ նրանց էջը հորով-մորով անենք և անցնենք առաջ»,- ասել է վարչապետը:
