Օզոնային շերտը մոլորակի տաքացմանն ավելի ուժգին կնպաստի
Ռեդինգի համալսարանի վերջերս անցկացրած հետազոտությունը ցույց է տվել, որ օզոնային շերտը մոլորակի տաքացմանն ավելի ուժգին կնպաստի, քան նախկինում ենթադրում էին: Չնայած օզոնային շերտը քայքայող նյութերի, մասնավորապես՝ քլորֆտորածխածինների (CFC) և հիդրոքլորֆտորածխածինների (HCFC), արգելքը նպաստել է օզոնային շերտի վերականգնմանը, դրա վերականգնումը, զուգորդված օդի աղտոտվածության աճի հետ, կարող է հանգեցնել լրացուցիչ 40%-ով ավելի տաքացման, քան սպասվում էր:
Հետազոտության արդյունքները հրապարակվել են Atmospheric Chemistry and Physics գիտական հանդեսում:
Երկրի մթնոլորտում գտնվող օզոնը 2015-2050 թվականների միջև ընկած ժամանակահատվածում կարող է լրացուցիչ 0,27 վատտ առաջացնել մեկ քառակուսի մետրի համար, ինչն այն ածխաթթու գազից հետո դարձնում է ապագա տաքացման երկրորդ ամենամեծ նպաստողը: Այդ հայտնագործությունն ընդգծում է կլիմայական քաղաքականության վերանայման անհրաժեշտությունը՝ օզոնի ազդեցության վերաբերյալ նոր տվյալների լույսի ներքո:
Գիտնականները համակարգչային մոդելներ են օգտագործել դարի կեսի մթնոլորտային փոփոխությունները մոդելավորելու համար՝ ենթադրելով սցենար՝ օդի աղտոտվածության ցածր մակարդակով, բայց CFC-ների և HCFC-ների աստիճանական դուրսբերմամբ, ինչպես պահանջվում է Մոնրեալի արձանագրությամբ: Արդյունքները ցույց են տվել, որ այդ նյութերի փուլային դուրսբերումը կլիմայական առումով ավելի քիչ օգուտ կունենա, քան սպասվում էր, քանի որ դրանք նաև ջերմոցային գազեր են։
Թեև օզոնային շերտի վերականգնումը կարևոր է մնում մարդկանց, կենդանիների և բույսերի առողջությանն ազդող ուլտրամանուշակագույն ճառագայթումից պաշտպանվելու առումով, գիտնականները զգուշացնում են, որ կլիմայական քաղաքականությունը պետք է հաշվի առնի օզոնի տաքացման ազդեցությունը: Կլիմայի փոփոխության ռազմավարությունները պետք է թարմացվեն՝ հաշվի առնելով այդ լրացուցիչ գործոնը:
