Ադրբեջանը՝ Հայաստանի հետ պայմանագիր կնքելով, ձգտում է հասնել իր իրական նպատակներին. Axios
Ադրբեջանը ձգտում է ազգային անվտանգության և տեխնոլոգիաների ոլորտում ավելի սերտ կապեր հաստատել ԱՄՆ-ի հետ՝ Թրամփի վարչակազմի միջնորդությամբ կնքված խաղաղության հռչակագրից հետո, գրում է Axios-ը:
«Ադրբեջանը սեղմված է Ռուսաստանի և Իրանի միջև, որոնք Վաշինգտոնի ամենասուր փշերից են։ Այն նաև նավթի և գազի խոշոր արտահանող է և ունի լավ սպառազինված զինված ուժեր։ Երկիրն ունի Ամերիկայի հետ համագործակցության պատմություն, ներառյալ՝ օդային թռիչքների իրավունքի և վառելիքի լիցքավորման կանգառների տրամադրումը ահաբեկչության դեմ համաշխարհային պատերազմի ընթացքում։ Սակայն Ադրբեջանի երկարատև հակամարտության պատմությունը ԱՄՆ-ում ազդեցիկ սփյուռք ունեցող հարևան Հայաստանի հետ, իր հետքն է թողել հարաբերությունների վրա»,- նշում է լրատվամիջոցը։
Ադրբեջանի դեսպանատանը տված հարցազրույցում դեսպան Խազար Իբրահիմը Axios-ին ասել է, որ իր կառավարությունն այժմ «կաշխատի աշխատանքային խմբեր ստեղծելու և բոլոր ոլորտներում հարաբերությունները զարգացնելու համար՝ տնտեսության, էներգետիկայի, պաշտպանության, քաղաքականության, կրթության ուղղությամբ, ինչ կցանկանաք, տեխնոլոգիաների, արհեստական բանականության ոլորտներում»։
«Եկեք նոր էջ բացենք: Եկեք միասին աշխատենք ոչ միայն հայ-ադրբեջանական, այլև ադրբեջանա-ամերիկյան հարաբերությունների համար»,- ասվում է հոդվածում։
Իբրահիմը շնորհակալություն է հայտնել նախագահ Թրամփին խաղաղության գործընթացի առաջխաղացման համար՝ նշելով, որ նա «101 տոկոսով» արժանի է խաղաղության Նոբելյան մրցանակին։
«Այս շատ կարճ ժամանակահատվածում՝ մոտ վեց ամսվա ընթացքում, նա կարողացել է անել այն, ինչ ուրիշները չեն կարողացել անել ավելի քան 30 տարի»,- ասել է դեսպանը։
ԱՄՆ պաշտոնյաներից մեկը լրատվամիջոցին տված հարցազրույցում հայտարարել է, որ Թրամփի վարչակազմի օգտին արվող հաճոյախոսություններն, ըստ ամենայնի, Ադրբեջանի հիմնական դրդապատճառն էր խաղաղության համաձայնագիրը ստորագրելու համար։
