Թեհրանը ողջունում է Հայաստանի և Ադրբեջանի այդ քայլը, բայց դեմ է ոչ տարածաշրջանային ուժերի միջամտությանը․ Իրանի փոխնախագահ

Իրանի Հանրապետությունը, ընդգծելով տարածաշրջանում խաղաղության և կայունության ամրապնդման կարևորությունը, ողջունում է Հայաստանի և Ադրբեջանի միջև խաղաղության համաձայնագիրը։ Այս մասին ԵԱՏՄ միջկառավարական խորհրդի նիստին հայտարարել է Իրանի առաջին փոխնախագահ Մոհամմադ Ռեզա Արեֆը։

«Հայտնելով երկրների տարածքային ամբողջականության նկատմամբ հարգանքի վերաբերյալ մեր անփոփոխ դիրքորոշման մասին՝ գտնում ենք, որ օտարերկրյա պետությունների միջամտությունը տարածաշրջանի գործերին չի նպաստի կայուն անվտանգությանը»,- շարունակել է Ռեզա Արեֆը։

Հիշեցնենք, որ օգոստոսի 14-15-ը Ղրղզստանի Չոլպոն Աթա քաղաքում անցկացվում է ԵԱՏՄ միջկառավարական խորհրդի նիստը։ ԵԱՏՄ «հնգյակի» կառավարությունների ղեկավարները կքննարկեն առևտրի, մաքսային վարչարարության, տրանսպորտային ենթակառուցվածքների զարգացման, նավթի և գազի ընդհանուր շուկաների ձևավորման, դեղերի և բժշկական ապրանքների շուկաների զարգացման և այլնի հարցեր։

Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից։ Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը։ց