Գերմանիան պարզաբանում է պահանջում Չինաստանից
Գերմանիայում Չինաստանի դեսպանը կանչվել է արտաքին գործերի նախարարությունը, որտեղ գերմանական կողմն իր բողոքն է հայտնել Կարմիր ծովում գործողություն իրականացնող գերմանական ինքնաթիռի վրա լազերային հարձակման կապակցությամբ: Այս մասին ասվում է X սոցիալական հարթակում Գերմանիայի Արտաքին գործերի նախարարության տարածած հաղորդագրության մեջ
«Գերմանացի անձնակազմին թիրախավորելը և գործողությունները խաթարելը բացարձակապես անընդունելի է»,- ասվում է ԱԳՆ գրառման մեջ։
Գերմանիայի ՊՆ պնդմամբ՝ օդանավը չինական ռազմանավի կողմից լազերային հարձակման է ենթարկվել՝ «առանց որևէ պատճառի կամ նախազգուշացման»։
Որպես նախազգուշական քայլ՝ օդանավի առաքելությունը չեղարկվել է։ Ինքնաթիռը վայրէջք է կատարել Ջիբութիի ռազմաբազայում։ Անձնակազմից տուժածներ չկան։ Ավելի ուշ ինքնաթիռը ԵՄ առաքելության հետ վերսկսել է գործողությունները Կարմիր ծովում։
