Քանի զինվոր է Հյուսիսային Կորեան ուղարկել Ռուսաստան. զեկույց
Հյուսիսային Կորեան վերջին տարվա ընթացքում 14,000 զինվոր, միլիոնավոր զինամթերք է մատակարարել Ռուսաստանին՝ ներառյալ հրթիռներ և հրետանային համակարգեր, ըստ Պատժամիջոցների բազմակողմ մոնիտորինգի թիմի (MSMT) նոր զեկույցի, գրում է CNN-ը։ Փհենյանի աջակցությունը նպաստել է Մոսկվայի՝ Ուկրաինայի քաղաքացիական բնակչության «ահաբեկման» գործողություններին եռամյա պատերազմի ընթացքում։
Թիմի բացահայտումներից մի քանիսը արդեն հայտնի էին՝ մասնավորապես, Հյուսիսային Կորեայի զինվորների մասնակցությունը ռուսական կողմում, սակայն այս զեկույցում մանրամասն ներկայացված է Փհենյանի տրամադրած ռազմական օգնության ծավալը և չափը՝ Ուկրաինայի դեմ պատերազմի մեկնարկից ի վեր։
Միայն 2024 թվականին Հյուսիսային Կորեան Ռուսաստանին է տրամադրել մոտ 9 միլիոն միավոր հրետանային արկ և զինամթերք, 2023 թվականին՝ ավելի քան 11,000 զինվոր, իսկ 2024-ի սկզբին՝ ևս 3,000 զինվոր, տրամադրվել են նաև ռեակտիվ համակարգեր, զրահամեքենաներ, ինքնագնաց հրետանի և այլ ծանր զինտեխնիկա։
Ըստ զեկույցի, առնվազն 100 բալիստիկ հրթիռ արձակվել է Ուկրաինայի քաղաքացիական ենթակառուցվածքները ոչնչացնելու և բնակեցված վայրերը, ինչպես օրինակ Կիևը և Զապորոժիեն, ահաբեկելու նպատակով։
«Այս ապօրինի համագործակցությունը Հյուսիսային Կորեայի և Ռուսաստանի միջև մեծապես նպաստել է Մոսկվայի հրթիռային հարվածների ակտիվացմանը Ուկրաինայի քաղաքներին և քաղաքացիական կարևոր նշանակության օբյեկտներին», նշված է զեկույցում։
Փոխարենը Ռուսաստանը Հյուսիսային Կորեային է մատակարարել հակաօդային պաշտպանության համակարգեր, հակաօդային հրթիռներ, էլեկտրոնային պատերազմի համակարգեր, ինչպես նաև վերամշակված նավթ։
Զեկույցը նաև նշում է, որ Ռուսաստանը տեխնիկական տվյալներ է տրամադրել Փհենյանի բալիստիկ հրթիռների վերաբերյալ՝ նպաստելով դրանց ճշգրտության բարելավմանը։
Այս փոխգործակցությունը Հյուսիսային Կորեային հնարավորություն է տալիս շարունակաբար ֆինանսավորել իր ռազմական ծրագրերը, այդ թվում՝ ՄԱԿ-ի անվտանգության խորհրդի մի քանի բանաձևերով արգելված բալիստիկ հրթիռների մշակումն ու կատարելագործումը, ինչպես նաև ձեռք բերել ժամանակակից պատերազմների վարելու իրական փորձ։
