Ուկրաինան անպայման կպատասխանի ռուսական այդ նախագծին. Զելենսկի

Ուկրաինայի նախագահ Վլադիմիր Զելենսկին հայտնել է, որ Ուկրաինան անպայման կպատասխանի պատերազմում խաղաղության հաստատման քայլերի վերաբերյալ «հուշագրի» ռուսական նախագծին: Զելենսկին այս մասին հայտարարել է մամուլի ասուլիսում։

Նա հիշեցրել է, որ Ուկրաինան աջակցել է կրակի անվերապահ դադարեցմանն ու հրադադարի հաստատման, ինչպես նաև դիվանագիտական ուղով առաջ շարժվելուն՝ ցանկացած ձևաչափով և մասնակիցներով։ Ուկրաինան պատրաստ է նաև հանդիպել ռուսական կողմի հետ՝ ինչպես անմիջական, այնպես էլ ԱՄՆ-ի կամ Եվրոպայի միջնորդությամբ։

«Ռուսաստանը Ստամբուլում ներկայացրեց համապատասխան պայմաններ, և մենք կարողացանք պայմանավորվել հազարավոր կալանավորների փոխանակման շուրջ։ Դա լավ արդյունք էր։ Սակայն հրադադարի հարցում Ստամբուլյան հանդիպման օրակարգի մնացած քայլերին Ռուսաստանը պատրաստ չէր։ Նրանք ասացին՝ մենք ձեզ կվերադառնանք որոշակի ազդակներով», – ասել է Զելենսկին։

Ըստ նրա՝ ԱՄՆ-ն և Թուրքիան Ուկրաինային փոխանցել են նույն տեղեկությունները ռուսական կողմից։