Աուտիզմ ունեցող երեխային չեն թողել մասնակցել Վերջին զանգին. մանրամասներ

Դավիթը, ով ունի աուտիզմ, այս տարի ավարտում է 9-րդ դասարանը, չբարձրացավ բեմ այսօր իր դասընկերների հետ: Այս մասին ֆեյսբուքյան իր էջում գրել էր Դավիթի մայրիկը։

«Այսօր իմ որդու` Դավիթի ավարտական օրն էր, բայց նա չմասնակցեց։ Իմ որդին չբարձրացավ բեմ, որովհետև դուք չհասաք նրա աշխարհ։ Աուտիզմը դատավճիռ չէ․ Դավիթն այսօր այնտեղ չէր, որովհետև իր իրական կարիքները չտեսան, չլսեցին, ու ոչ ոք չփորձեց ձևավորել մի տարածք, ուր նա կզգար իրեն վստահ ու արժևորված»,- այս մասին գրել է Սյուզի Շալունցը։

«ԿԳՄՍ նախարարությունը կարևորում է բոլոր երեխաների, մասնավորապես, կրթության առանձնահատուկ կարիք ունեցող երեխաների մասնակցությունը դպրոցական միջոցառումներին: Կրթական հաստատությունը պետք է անի հնարավոր բոլոր քայլերը, որպեսզի ցանկացած երեխա լիովին ընդգրկված լինի ուսումնական բոլոր գործընթացներում և միջոցառումներում»,- Այս մասին MediaHub-ին հայտնել են ԿԳՄՍՆ-ից։

Նախարարությունից հայտնեցին, որ այս դեպքը իրենց ուշադրության ներքո է, և հաջորդ շաբաթ նախարարը նախատեսում է հանդիպում ունենալ Դավիթի և իր ծնողի հետ։