Քննարկվում է ՆԱՏՕ-ում ԱՄՆ-ի առաջնորդության փոփոխման հարցը. FT

Եվրոպական մի շարք երկրներ ոչ պաշտոնական բանակցություններ են վարում ՆԱՏՕ-ի և մայրցամաքի պաշտպանության ֆինանսավորման հիմնական պատասխանատվությունը ստանձնելու շուրջ: Այս մասին գրում է Financial Times-ը՝ վկայակոչելով իր աղբյուրներին:

Հրատարակությունը գրում է․ «Եվրոպայի խոշորագույն ռազմական տերությունները պլաններ են մշակում մայրցամաքի պաշտպանության համար ԱՄՆ-ից ավելի մեծ պատասխանատվություն ստանձնելու համար»։ 

Ըստ թերթի զրուցակիցների՝ քննարկումներին մասնակցող երկրների թվում են Մեծ Բրիտանիան, Ֆրանսիան, Գերմանիան և Հյուսիսային Եվրոպայի երկրները։ Այս երկրները մտադիր են «պլան մշակել ֆինանսական և ռազմական բեռը եվրոպական մայրաքաղաքների վրա փոխադրելու վերաբերյալ և այն Միացյալ Նահանգներին ներկայացնել հունիսին Հաագայում կայանալիք ՆԱՏՕ-ի ամենամյա գագաթնաժողովի նախաշեմին»։

«Առաջարկը ներառելու է Եվրոպայում պաշտպանական ծախսերն ավելացնելու և ռազմական կարողությունները հզորացնելու հաստատուն պարտավորություններ։ Երկրները փորձելու են ԱՄՆ նախագահ Դոնալդ Թրամփին համոզել համաձայնել լիազորությունների աստիճանական փոխանցմանը: Ենթադրվում է, որ պլանը նախագծվելու է 5-10 տարվա համար։Հրատարակությունը նշում է, որ բանակցությունները փորձ են՝ խուսափելու քաոսից, որը կարող է առաջացնել ՆԱՏՕ-ից ԱՄՆ-ի միակողմանի դուրս գալը»,- պարզաբանվում է հրապարակման մեջ։