Ունենում ենք նոր փողոցներ, որտեղ մալուխներն ամբողջապես անցնում են գետնի տակ․ Ավինյան
Մենք այս տարի ունենում ենք նոր փողոցներ, որտեղ մալուխներն ամբողջապես անցնում են գետնի տակ, և այդ փողոցներն են՝ Պուշկինի, Սաֆարյանը, Ազատամարտիկներինը, Նալբանդյանը, Արգիշտիի, Դեմիրճյանը, Աբովյանը, Տիգրան Մեծի, Մելիք-Ադամյանը: Այդ մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը:
Նա ասել է, որ պետք է նաև համապարփակ ծրագիր իրականացնել մայթերի, մայթեզրերի և այլ հարցերով, որպեսզի տեսքն ամբողջանա, ինչպես դա արվել է Հանրապետության փողոցում:
«Ամիրյան փողոցում այս տարի ծրագիր ունենք, և, կարծում եմ՝ այս համադրումը մեր ծրագրերի շատ էֆեկտիվ է այն առումով, որ փողոցները, իրապես, ամբողջովին նոր տեսք են ստանում, ընդհանուր միջավայրը փոխվում է:
Կարծում եմ՝ պետք է շարունակական այս կապը պահենք, և ծրագրերն իրականացնեք միասնական տրամաբանությամբ»,- նշել է Ավինյանը:
