Այլ թեկնածուի կարիք չկա. Էրդողանը կրկին կառաջադրվի ընտրություններում

Թուրքիայում դիտարկում են գործող նախագահ Ռեջեփ Թայիփ Էրդողանի թեկնածությունը կրկին առաջադրելու հեռանակրը 2027 թվականի նոյեմբերին արտահերթ նախագահական ընտրություններում։ Այս մասին հայտնում է ՌԻԱ Նովոստին՝ վկայակոչելով իշխող «Արդարություն և զարգացում» կուսակցության (ԱԶԿ) փոխնախագահ Հյուսեին Յայմանին։

«Հուսով ենք, որ մենք կրկին կառաջադրենք մեր նախագահի թեկնածությունը 2027 թվականի նոյեմբերին կայանալիք ընտրություններում։ Այլ թեկնածուի կարիք չկա: Հաջորդ ընտրություններում մենք կրկին երկրի ղեկավար կդարձնենք մեր նախագահին»,- ասել է նա Անթալիայում կուսակցության անդամների հետ հանդիպման ժամանակ։

Հիշեցնենք՝ փետրվարի վերջին Türkiye թերթը, հղում անելով ԱԶԿ-ում ներկուսակցական քննարկումներին, հայտնել էր, որ իշխող կուսակցության անդամները ոչ պաշտոնապես քննարկում են 2027 թվականի աշնանը արտահերթ նախագահական և խորհրդարանական ընտրություններ անցկացնելու տարբերակը: