Հայաստանի և Ադրբեջանի միջև հակամարտությունը խորացել է. Օհանյան

Հայաստանի և Ադրբեջանի միջև հակամարտությունը ոչ միայն չի ավարտվել, այլև խորացել է։ «Եռաբլուր» զինվորական պանթեոնում լրագրողների հետ զրույցում այս մասին հայտնել է ԱԺ «Հայաստան» խմբակցության ղեկավար Սեյրան Օհանյանը։

«Ադրբեջանը, իրականացնելով ցեղասպանություն «հակաահաբեկչական գործողությունների ներքո», ամբողջովին հայաթափեց Արցախը։ Այսօր էլ հանցագործ պետությունը Բաքվում դատում է ինքնորոշված, օրինական ընտրված Արցախի Հանրապետության ռազմաքաղաքական ղեկավարությանը և մեր մարտական ընկերներին»,- ասել է Օհանյանը՝ ընդգծելով, որ ՀՀ իշխանություններն այս ուղղությամբ որևէ քայլ չեն անում, փոխարենը չափազանց սխալ որոշումներ են կայացվում կամ քննարկվում, ինչպես օրինակ, Ադրբեջանի դեմ ներկայացված միջազգային հայցերի հետկանչումը։

Նա կարծում է, որ Արցախի Հանրապետության իշխանությունները, բոլոր ինստիտուտները պետք է շարունակեն գործել, աշխատել և՛ Արցախի ժողովրդի կարգավիճակի, և՛ հավաքական պահելու, և՛ հետագայում Արցախ վերադառնալու առումով։ Օհանյանը նաև համաձայն է ՀՀ երկրորդ նախագահ Ռոբերտ Քոչարյանի դիրքորոշմանը, որ ԵԱՀԿ Մինսկի խմբի լուծարումը սխալ որոշում է նման իրավիճակում։