ԵՄ 10 երկրներ պահանջում են պատժամիջոցներ կիրառել ռուսական գազի դեմ. Bloomberg

ԵՄ 10 երկրներ պահանջում են պատժամիջոցներ կիրառել ռուսական բնական գազի և հեղուկ գազի դեմ: Այս մասին գրում է Bloomberg–ը:

Նշվում է, որ այս երկրների թվում են Շվեդիան, Իռլանդիան, Լեհաստանը և Բալթյան երեք հանրապետությունները, որոնք առաջարկում են արգելել խողովակաշարով գազի և հեղուկ բնական գազի (LNG) ներմուծումը ԵՄ՝ սահմանափակելու այն եկամուտները, որոնք Կրեմլն օգտագործում է ուկրաինական ռազմական հակամարտությունը ֆինանսավորելու համար:

Չնայած ԵՄ-ն արդեն արգելել է ռուսական նավթի ներկրումը, սակայն որոշ երկրների կախվածությունը Ռուսաստանի գազից մինչ այժմ խոչընդոտում է այս տեսակի վառելիքի նկատմամբ պատժամիջոցների կիրառմանը։ Սահմանափակիչ միջոցների ընդունումը պահանջում է ԵՄ անդամ բոլոր 27 երկրների միաձայն հավանությունը։

Այնուամենայնիվ, ըստ գործակալության, սա գնալով ավելի բարդ խնդիր է դառնում՝ հաշվի առնելով Հունգարիայի վարչապետ Վիկտոր Օրբանի թերահավատությունը նման քայլերի նկատմամբ։

«Վերջնական նպատակն է հնարավորինս շուտ արգելել ռուսական գազի և հեղուկ բնական գազի ներկրումը», - նշվում է Bloomberg News-ին հասանելի դարձած փաստաթղթում, որում հիշատակվում են նաև Դանիան, Ֆինլանդիան, Չեխիան և Ռումինիան: