Մակրոնը իր ելույթում մեղադրել է Իլոն Մասկին, միաժամանակ չտալով նրա անունը

Ֆրանսիայի նախագահ Էմանուել Մակրոնը, ելույթ ունենալով Փարիզում Ֆրանսիայի դեսպանների հետ, մեղադրել է միլիարդատեր և X սոցիալական ցանցի սեփականատեր Իլոն Մասկին եվրոպական քաղաքականությանը միջամտելու մեջ։

Մակրոնը Մասկի անունը չի նշել, սակայն, ինչպես նշում է Politico-ն, նրա ելույթից պարզ էր դառնում, որ խոսքը գնում է գործարարի մասին։

«Ո՞վ կարող էր 10 տարի առաջ պատկերացնել, որ աշխարհի ամենամեծ սոցիալական ցանցերից մեկի սեփականատերը կաջակցի  և ուղղակիորեն կմիջամտի ընտրություններին, այդ թվում՝ Գերմանիայում»,- ասել է Ֆրանսիայի նախագահը։

Մակրոնն իր ելույթում անդրադարձել է նաև ուկրաինական պատերազմի թեմային։ Նրա կարծիքով, Կիևը պետք է «իրատեսական բանակցություններ վարի տարածքային հարցերի շուրջ»՝ նշելով, որ «միայն նա կարող է դրանք վարել»։

«Միացյալ Նահանգները պետք է օգնի մեզ փոխել իրավիճակը և համոզի Ռուսաստանին գալ բանակցությունների սեղանի շուրջ, մինչդեռ Եվրոպան պետք է ստանձնի Ուկրաինայի անվտանգության երաշխիքների հիմնական պատասխանատվությունը»,- Մակրոնի խոսքերն է մեջբերում RFI Russian Service-ը։

Նա ընդգծել է, որ չնայած ԱՄՆ նորընտիր նախագահ Դոնալդ Թրամփի՝ հակամարտությունը հնարավորինս շուտ լուծելու խոստումներին, «Ուկրաինայի համար արագ և հեշտ լուծում չի լինի»։ Մակրոնը նաև նշել է, որ եվրոպական երկրները չեն կարող իրենց թույլ տալ Ռուսաստանին հաղթել պատերազմում, քանի որ դա կվտանգի միջազգային կարգը և Եվրոպայի անվտանգությունը։