Նախկին ֆուտբոլիստը` Վրաստանի նախագահի թեկնածու

Իշխող «Վրացական երազանք-Ժողովրդավարական Վրաստան» կուսակցությունը երկրի նախագահի պաշտոնում առաջադրել է պատգամավոր, նախկին ֆուտբոլիստ Միխեիլ Կավելաշվիլիի թեկնածությունը։

«Ուրախ եմ հայտարարել, որ կուսակցության քաղխորհրդի որոշման համաձայն՝ առաջադրում եմ Միխեիլ Կավելաշվիլիի թեկնածությունը Վրաստանի նախագահի պաշտոնում», - կուսակցության կենտրոնական գրասենյակում կայացած ճեպազրույցում ասել է «Վրացական երազանքի» հիմնադիր Բիձինա Իվանիշվիլին։

Ինչպես նշել է Իվանիշվիլին, դեռևս իր քաղաքական կարիերայի մեկնարկից առաջ Կավելաշվիլին «անզիջում արտահայտել է իր սկզբունքային դիրքորոշումը երկրի համար կարևոր բոլոր հարցերի վերաբերյալ»։

Ինչ վերաբերում է վերջին տարիներին, երբ նա եղել է խորհրդարանի անդամ, նախագահի թեկնածուն, ըստ Իվանիշվիլիի, «հսկայական ներդրում է ունեցել երկրի շահերի պաշտպանության և ինքնիշխանության ամրապնդման գործում»։

Միխեիլ Կավելաշվիլին ծնվել է 1971 թվականի հուլիսին Վրաստանի Բոլնիսի քաղաքում։ Ֆուտբոլային կարիերայի ընթացքում հանդես է եկել Թբիլիսիի «Դինամոյում», Վլադիկավկազի «Ալանիայում», անգլիական «Մանչեսթեր Սիթիում» և շվեյցարական «Գրասհոպեր», «Ցյուրիխ» և «Լյուցեռն» ակումբներում։ Նա խաղացել է նաև Վրաստանի հավաքականում։ 2016 թվականից Կավելաշվիլին իշխող կուսակցությունից պատգամավոր է։