Ադրբեջանը կրկին մեղադրանքներ է հնչեցրել. Ֆրանսիայի դեսպանը կանչվել է ԱԳՆ
2024 թվականի նոյեմբերի 20-ին Ադրբեջանում Ֆրանսիայի դեսպան Անն Բոյոնը կանչվել է Ադրբեջանի ԱԳՆ։ Այս մասին հայտնում են տեղի լրատվամիջոցները։
Ըստ տարածված տեղեկատվության՝ հանդիպման ընթացքում ադրբեջանական կողմը բողոքել է Կլիմայի փոփոխության շրջանակային կոնվենցիայի (COP-29) կողմերի համաժողովի 29-րդ նստաշրջանը խափանելու Ֆրանսիայի փորձերի դեմ, որն անցկացվում է Բաքվում՝ Ադրբեջանի նախագահությամբ։ .
Ադրբեջանը նաև Ֆրանսիային մեղադրել է Հայաստանի հետ խաղաղ գործընթացը խաթարելու մեջ։
«Փարիզը ակտիվորեն զինում է Երևանին՝ խրախուսելով միլիտարիզմն ու ռևանշիզմը, ինչը հարված է երկու երկրների հարաբերությունների կարգավորմանն ուղղված ջանքերին։ Մենք Ֆրանսիայից պահանջում ենք դադարեցնել Ադրբեջանի դեմ ուղղված քայլերը, որոնք վտանգում են կարգավորման գործընթացը»,- ասվում է հազորդագրության մեջ։
Ինչպես ավելի վաղ հայտնել էինք, նոյեմբերի 19-ին Ադրբեջանի դեսպան Լեյլա Աբդուլլաևան կանչվել է Ֆրանսիայի ԱԳՆ՝ COP-29-ի շրջանակներում «ադրբեջանական իշխանությունների կողմից Ֆրանսիայի և եվրոպացիների դեմ անընդունելի հայտարարությունների պատճառով»։
