ՏԵՍԱՆՅՈՒԹ. Արմեն Փամբուխչյանն` Անդրանիկ Քոչարյանի հետ հարաբերությունների մասին
Մենք որեւէ խնդիր չունենք: Այս մասին այսօր՝ նոյեմբերի 19-ին, Երեւանի քաղաքապետարանում լրագրողների հետ զրույցում նշեց Երեւանի փոխքաղաքապետ Արմեն Փամբուխչյանը՝ անդրադառնալով հարցին, թե ինչ խնդիր կա իր եւ ՔՊ-ական պատգամավոր Անդրանիկ Քոչարյանի միջեւ, արդյոք ինքն էլ ՔՊ վարչության նիստին բարձրաձայնել է Անդրանիկ Քոչարյանի պաշտոնանկության հարցը:
«Ես որ հաստատ չունեմ, վստահ եմ, որ պարոն Քոչարյանը նույնպես չունի։ Մենք վարչության նիստում տարբեր հարցեր քննարկում ենք, տարբեր գործընկերներից, սկսած ինձնից և վերջացրած մյուս բոլոր գործընկերներով, բայց ես անհատապես և անձնապես որևէ խնդիր չունեմ պարոն Անդրանիկ Քոչարյանի հետ: Ես մեծ հույս ունեմ, վստահ եմ, որ ինքն էլ նույնպես»,-ասաց նա՝ վստահեցնելով, որ ինքը Անդրանիկ Քոչարյանի պաշտոնանկության հարց չի բարձրացրել:
Դիտարկմանը, որ Անդրանիկ Քոչարյանը դժգոհել էր իրենից, որ ինչ-որ հարցով դիմել է, չեք լուծել, Փամբուխչյանն ասաց. «Այդ խնդրի մասով չէի ուզենա բարձրաձայնել, բայց նշեմ, որ տվյալ հարցը լուծվել է: Ուղղակի այդ մի քիչ ձգձգումը եղել է կապված քաղաքապետարանի և մեկ այլ կառույցի հետ: Որոշակի անհամապատասխանություններ են եղել, քաղաքապետարանի կողմից այլ նախագիծ է առաջարկվել, «ՀԵՑ»-ը, եթե չեմ սխալվում, այլ նախագիծ է բերել, այդ նախագծի շուրջ ընդամենը բանակցություն է եղել և ըստ էության լուծվել է։
Այդ խնդիրը լուծված է և շատ ու շատ խնդիրներ Երևանում այսօր լուծվում են: Ոչ բոլոր խնդիրներն են մեկ օրում լուծվում կամ երկու օրում, խնդիրներ կան, որոնք որ կարող են տևել ամիսներ, բայց ամենակարևորը այն է, որ ճիշտ և փոխըմբռնման կամ կոմպրոմիսային տարբերակով լուծվում են»:
