Դեմոկրատ սենատորները կոչ են արել հետաքննել Մասկի շփումները Ռուսաստանի հետ

Ամերիկացի գործարար Իլոն Մասկը հայտարարել է, որ կգտնի և «ոչնչացնի» նրանց, ովքեր իրեն մեղադրում են Ռուսաստանի հետ ենթադրյալ շփումների համար։

Ավելի վաղ Reuters-ը, վկայակոչելով օրենսդիրների նամակը, որը ստացել էր, հայտնել է, որ սենատորներ Ջին Շահինը և Ջեք Ռիդը կոչ են արել Պենտագոնին և ԱՄՆ արդարադատության նախարարությանը հետաքննել Մասկի ենթադրյալ շփումների մասին հաղորդումները ռուսական իշխանությունների, այդ թվում և Վլադիմիր Պուտինի հետ: 

Մտահոգությունները բխում են Իլոն Մասկի և ռուս պաշտոնյաների ենթադրյալ խոսակցություններից, որոնք Wall Street Journal-ի պնդմամբ տեղի են ունեցել դեռևս հոկտեմբերին: Սենատորներն առաջարկել են դիտարկել պետական գնումներին մասնակցելուց Մասկի բացառման հնարավորությունը, եթե հաստատվի կանոնների խախտում։

«Ես պարզելու եմ, թե ով է այս մեղադրանքներն առաջադրում և ես պատրաստվում եմ ոչնչացնել նրանց: Նրանք պարզապես խամաճիկներ են: Պարզելու եմ ով է իրականում գրել սա և ստիպել է այդ ապուշներին ստորագրել – գրել է Մասկը X սոցիալական ցանցում: