ՄԻՊ-ը համաձայն է Նիկոլ Փաշինյանի հետ
Ես խնդիրներ տեսնում եմ և պետական իրավասու մարմիններին այդ մասին տարբեր ձևաչափերով բազմիցս եմ հայտնել։ Այս մասին լրագրողների հետ զրույցում ասաց Մարդու իրավունքների պաշտպան Անահիտ Մանասյանը։
«Մեր հանրապետությունում մարդիկ չպետք է լինեն, որոնք իրենց զգան որպես արտոնյալ, կապ չունի, նրանք նախկին թե ներկա իշխանության ներկայացուցիչներ են։ Նաև չպետք է լինեն քաղաքացիներ, որոնք իրենց արժանապատվությունը և իրավունքները հարգված չեն զգում»,-ասաց Մանասյանը։
Այսօր կառավարության նիստին վարչապետ Նիկոլ Փաշինյանը հայտարարել է, թե իր համբերության բաժակը լցվել է։ Նա ասել է, որ իրավապահ համակարգին տվել է անհրաժեշտ ամեն բան՝ արդյունավետ աշխատանքի համար, բայց արդյունք չի տեսնում։
ՄԻՊ-ի խոսքով՝ տարբեր իրավասու մարմինների մոտ տեսնում է արհեստավարժության շատ լուրջ պակասի խնդիր։
«Դրա առնչությամբ ես անընդհատ խոսել եմ, հիմա էլ եմ խոսում, արձանագրում։ Խնդիրների մի մասը բխում է նրանից, որ շատերն ընդհանրապես չունեն պատշաճ գիտելիքներ և հմտություններ՝ տարատեսակ ոլորտներում։ Պետք է աշխատենք այդ խնդիրների լուծման ուղղությամբ»,-ասաց նա։
