Ինչու է խմելու ջուրը ծորակից հոսում ժանգագույն․ մանրամասներ

Արդեն մի քանի օր է Զովունիում խմելու ջուրը ծորակից հոսում է ժանգագույն։ Այս մասին Auroranews-ն ահազանգ է ստացել։ 

Մանրամասներ ճշտելու համար Auroranews-ը կապ հաստատեց ՀՀ հանրային ծառայությունները կարգավորող հանձնաժողով (ՀԾԿՀ), որտեղից մեզ ասացին, որ «Վեոլիա Ջուր»-ը տարածքում վթարավերականգնողական աշխատանքներ է իրականացնում, սակայն ջրանջատում չեն արել՝ ասելով, որ ավելի անվտանգ է աշխատել ջրի հոսքի ներքո։

«Նման դեպքերում օրենքը պահանջում, որպեսզի տարածքի բնակիչները տեղեկացված լինեն։ Ընկերությունը պարտավոր է հայտարարություն տարածել, որ խմելու ջուրը օգտագործելու չէ»,-ասացին ՀԾԿՀ-ից՝ ասելով, որ ընկերությունը խոստացել է մինչև օրվա վերջ աշխատանքներն ավարտել։

Եթե նման իրավիճակը շարունակվի, գերատեսչությունից ասացին, որ ճիշտ կլինի գրավոր դիմում գրել։

Ավելի վաղ հաղորդել էինք, որ Auroranews-ն ահազանգ է ստացել, որ արդեն մի քանի օր է Զովունիում խմելու ջուրը ծորակից հոսում է ժանգագույն։ Նշվում է, որ ջուրը 14 ժամից ավելի չի մաքրվում։ Auroranews-ը ևս կապ հաստատեց «Վեոլիա Ջուր», որտեղից ժամանակ խնդրեցին պարզաբանում տալու համար, այնուհետև զանգերին չպատասխանեցին։