Կադիրովն իր երկրի երիտասարդներին սպառնացել է ՌԴ ԶՈՒ ուղարկելով

Չեչնիայի ղեկավար Ռամզան Կադիրովը Telegram-ի իր ալիքում գրել է, որ հանրապետությունում երիտասարդ իրավախախտներին վարչական պատասխանատվության ենթարկելու փոխարեն կուղարկեն պայմանագրային ծառայության՝ հատուկ ռազմական գործողության գոտի:

Հանրապետության ղեկավարը հայտարարել է, որ դա վերաբերում է երիտասարդությանը, որոնք «կարծում են, որ իրենց համար ոչ մի օրենք գրված չէ», որոնք «պարապ, անբարոյական ապրելակերպ են վարում»:

Նրա խոսքով՝ սա այն մարդկանց է վերաբերում, ովքեր կարող են կոնֆլիկտներ հրահրել, ղեկին նստել արգելված դեղամիջոցների ազդեցության տակ, սխալ կայանել կամ «խախտել երթեւեկության կանոնները՝ հպարտանալով դրանով»:

«Կամ ճաղերի հետևում՝ ըստ առավելագույն ժամկետի, կամ պայմանագիր ստորագրիր և գնա հատուկ ռազմական գործողության գոտի», - ասվում է Կադիրովի գրառման մեջ։

Չեչնիայի ղեկավարը նշել է, որ այս իրավախախտներին ավելի նպատակահարմար է ծառայության ուղարկել ՌԴ ԶՈՒ, քան վարչական պատասխանատվության ենթարկել: Նրա խոսքով՝ այժմ հանրապետությունում ձևավորվում է նոր գունդ՝ 2,5 հազար մարդու համար։

«Բոլորի համար տեղեր կգտնվեն», - նշել է Կադիրովը: