Հայ ժողովրդի մեջ ահռելի հիասթափություն կա ՌԴ-ի նկատմամբ. Միրզոյան
Գաղտնիք չէ, որ հայ հասարակության մեջ ահռելի հիասթափություն կա Ռուսաստանի, նրա հետ դաշնակցային հարաբերությունների նկատմամբ. այս մասին Վարշավայի անվտանգության համաժողովում հայտարարել է ՀՀ ԱԳ նախարար Արարատ Միրզոյանը:
«Հայ ժողովուրդը տասնամյակներ շարունակ հավատացած էր, որ եթե ինչ-որ բան պատահի, ՌԴ-ն կօգնի, կպաշտպանի մեզ: Բայց հայերը տեսան՝ դա այդպես չէ, մենք չստացանք այդ օգնությունը: Ավելին՝ 2020-ի պատերազմից հետո ՌԴ խաղաղապահներն ուղարկվեցին Լեռնային Ղարաբաղ, սակայն մենք տեսանք, որ հարկադիր տեղահանման ժամանակ խաղաղապահ առաքելությունը չաշխատեց, չարդարացրեց իրեն», - ասել է Միրզոյանը:
Նա նաև հիշեցրել է, որ երբ հարձակում տեղի ունեցավ ՀՀ-ի միջազգայնորեն ճանաչված սահմանների վրա, ՀԱՊԿ-ի շրջանակում Երևանի պաշտոնական դաշնակիցները չեն արձագանքել ՀՀ-ի սպասումներին համապատասխան: Ըստ Միրզոյանի՝ այս ամենը հանգեցրել է նրան, որ ՀՀ բնակչությունը հիասթափվել է և այժմ այլընտրանքներ է փնտրում:
«Այս իրավիճակը մեզ ավելի է մոտեցրել Եվրամիությանը, ԱՄՆ-ին: Հասարակության արժեքների համատեքստում մենք մոտ էինք ԵՄ-ին, արևմտյան երկրներին, բայց անվտանգության համատեքստում ՝ Հայաստանի ժողովուրդը հոգեբանորեն իրեն կապում էր ՌԴ-ի հետ: Հիմա այս երկրորդ բաղադրիչն ի չիք է դարձել: Մարդիկ այլևս որևէ պատճառ չեն տեսնում իրենց ամբողջապես Եվրամիության հետ չկապելու համար», - ասել է Միրզոյանը:
