Փաշինյանը` «խաղաղության պայմանագիրում» չհամաձայնեցված կետերի մասին

Մենք Ադրբեջանին ասում ենք՝ եկեք, ինչը համաձայնեցված է ստորագրենք, եւ անցնենք մնացածին, որը համաձայնեցված չի, եւ հնչում է տեսակետ, որ ոչ, մինչեւ բոլոր հոդվածները չհամաձայնեցվեն, «խաղաղության պայմանագիրը» պետք է չստորագրվի: Այս մասին, այսօր՝ սեպտեմբերի 18-ին, Համաշխարհային հայկական գագաթաժողովի ժամանակ հայտարարեց ՀՀ վարչապետ Նիկոլ Փաշինյանը:

«Իսկ քանի՞ հոդված պետք է լինի այդ պայմանագրում: Օրինակ, կա մի հոդված, որը չհամաձայնեցված է, որը Ադրբեջանն ամիսներ առաջ է առաջարկել: Ենթադրենք կա X թվով հոդված, որոնք բոլորը համաձայնեցված են: Կողմերից մեկը կարող է ասել՝ մի հատ հոդված էլ կա, դա էլ պետք է համաձայնեցնել: Կարող ենք դա էլ համաձայնեցնել, հետո կարող է պարզվի, որ էլի մի հոդված կա: Ոչ մի տեղ չկա գրված, որ խաղաղության պայմանագիրը պետք է ունենա 25 հոդված եւ չի կարող ունենալ 14 կամ 17 հոդված: Այստեղ խնդիրը քաղաքական կամքի մեջ է:

Անընդհատ կարող է առաջ գլ եւս մեկ հոդված եւ կողմերից մեկը կարող է ասել՝ մինչեւ սա չհամաձայնենցնենք մենք անիմաստ ենք համարում այդ պայմանագրի ստորագրումը: Փաստն այն է, որ չկա որեւէ պայմանագիր, որը պատասխանում է բոլոր հնարավոր հարցերին»,- ընդգծեց Նիկոլ Փաշինյանը: