YouTube-ը կդադարեցնի դեռահասներին գեղեցկության ստանդարտներ քարոզող տեսանյութեր ցուցադրել

YouTube–ը պարտավորվում է պաշտպանել դեռահասներին այսպես կոչված գեղեցկության իդեալները խթանող բովանդակությունից, հինգշաբթի այս մասին հայտնել է ընկերությունը, գրում է РИА Новости–ն:

«Դեռահասները, ի տարբերություն մեծահասակների, ավելի հակված են իրենց մասին բացասական կարծիքի ձևավորմանը, երբ անընդհատ տեսնում են գեղեցկության ստանդարտացված պատկերներ իրենց օգտագործած առցանց բովանդակության մեջ..., մենք ամբողջ աշխարհում սահմանափակում ենք տեսանյութերի կրկնվող առաջարկությունները, որոնք կապված են այս թեմայի հետ»,– նշվում է ընկերության հաղորդագրության մեջ:

Բովանդակությունը, որը, ըստ մասնագետների, անվտանգ է սահմանափակ քանակությամբ, բայց կարող է հանգեցնել հոգեկան առողջության խնդիրների, եթե բազմիցս դիտվի, վերաբերում է «ֆիզիկական հատկանիշներին և գեղեցկության որոշ ձևերի իդեալականացմանը մյուսների նկատմամբ, ֆիթնեսի մակարդակի կամ որոշակի քաշի իդեալականացմանը, ինչպես նաև սոցիալական ագրեսիայի ոչ կոնտակտային ձևեր պարունակող տեսանյութեր, այդ թվում՝ ահաբեկում»: