ԱՄՆ-ը պատժամիջոցներ է կիրառել RT-ի և Մարգարիտա Սիմոնյանի նկատմամբ
Չորեքշաբթի ԱՄՆ ֆինանսների նախարարը հայտարարել է RT հեռուստաալիքը և նրա գլխավոր խմբագիր Մարգարիտա Սիմոնյանին պատժամիջոցների ցանկում ավելացնելու որոշման մասին։ Այս մասին գրում է Интерфакс–ը:
Ցուցակում ընդգրկվել են նաև RT-ի գլխավոր խմբագրի տեղակալներ Ելիզավետա Բրոդսկայան և Անտոն Անիսիմովը։
ԱՄՆ ֆինանսների նախարարությունը հայտարարության մեջ նշել է, որ ընդհանուր առմամբ պատժամիջոցներ են սահմանվում 10 ֆիզիկական և երկու իրավաբանական անձանց նկատմամբ։
«Սա արվում է որպես ԱՄՆ իշխանությունների համակարգված գործողությունների մի մաս՝ ի պատասխան Ռուսաստանի՝ 2024 թվականի ԱՄՆ նախագահական ընտրությունների արդյունքների վրա ազդելու փորձերի»,- ասվում է հաղորդագրությունում:
Ֆինանսների նախարարությունը պարզաբանել է, որ պատժամիջոցները նախատեսում են ԱՄՆ-ում պատժամիջոցների ցանկում հայտնված անձանց գույքի կամ ԱՄՆ քաղաքացիների վերահսկողության տակ գտնվող գույքի արգելափակում։ Բացի այդ, բոլոր առնչվող ֆինանսական գործարքները Միացյալ Նահանգներում կամ ԱՄՆ տարածքի միջոցով արգելված են:
