Պուտինն աշակերտներին կոչ է արել իրենից «վատ օրինակ» չվերցնել

Ռուսաստանի Դաշնության նախագահ Վլադիմիր Պուտինը Կզըլ քաղաքի դպրոցներից մեկում «Խոսեք կարևոր բաների մասին» խորագրով բաց դաս է անցկացրել, որի ժամանակ աշակերտները երկրի նախագահին հարցեր են հղել նրա առօրյայի վերաբերյալ: Այս մասին գրում է ՏԱՍՍ-ը:

Պուտինը խոստովանել է, որ այսօր ընդամենը չորս ժամ է քնել, սակայն սովորաբար փորձում է մոտ վեց ժամ քնել։ Պուտինն իր օրինակը «վատ» է որակել:

«Չեմ ուզում ստել, ճիշտը կասեմ, բայց օրինակը վատն է, այս հարցում ինձանից օրինակ մի վերցրեք: Այն, որ ես այսօր ընդամենը չորս ժամ եմ քնել... ոչ թե այն պատճառով, որ ես այդքան զբաղված մարդ եմ, այլ այն պատճառով, որ չեմ կարողանում ճիշտ կազմակերպել իմ աշխատանքային օրը»,- ասել է Պուտինը:

Նա ընդգծել է, որ վեց ժամ քունը շատ քիչ է, և պետք է քնել առնվազն ութ ժամ։

Նախագահը հավելել է, որ դպրոցականները չպետք է իր օրինակին հետևեն։

«Յուրաքանչյուր մարդ պետք է քննադատաբար վերաբերվի այն ամենին, ինչ անում է իր նկատմամբ և հետևություններ անի։ Ես կփորձեմ դա անել և ձեզ էլ եմ խորհուրդ տալիս»,- եզրափակել է Պուտինը։