Բրազիլիան սուգ է հայտարարել․ ՀՀ-ն ցավակցություն է հայտնել

Բրազիլիայի առաջնորդ Լուիս Ինասիո դա Սիլվան եռօրյա սուգ է հայտարարել՝ ի հիշատակ Վինհեդո քաղաքի մերձակայքում տեղի ունեցած ավիավթարի զոհերի։ Ուրբաթ օրը վթարի է ենթարկվել մարդատար ինքնաթիռը, որում եղել է 61 մարդ։

«Ի հիշատակ Վինետուում տեղի ունեցած ողբերգական դեպքի 61 զոհերի՝ մենք երկրում պաշտոնական եռօրյա սուգ ենք հայտարարում»,- գրել է Լուլան։

Համաձայն հայտարարության տեքստի՝ այն ուժի մեջ է մտնում հրապարակման պահից։

Հիշեցնենք՝ Voepass ATR-72 օդանավը Կասկավելից (Պարանա նահանգ) թռիչք է կատարել դեպի Գուարուլյոս (Սան Պաուլո)՝ 57 ուղևորներով և անձնակազմի 4 անդամներով։ Օդանավն ընկել է Վինհեդո քաղաքի մոտ։ Ինքնաթիռում գտնվող բոլոր մարդիկ զոհվել են։ Ինքնաթիռի կործանման պատճառներն անհայտ են։

ՀՀ արտգործնախարարությունն էլ ցավակցություն է հայտնել Բրազիլիային՝ օգոստոսի 9-ին Սան Պաուլո նահանգում տեղի ունեցած ավիավթարի կապակցությամբ։ 

«Հայաստանը համերաշխ է Բրազիլիայի հետ, որը սգում է Սան Պաուլու նահանգում ավիավթարի հետևանքով 61 ուղևորի և անձնակազմի անդամի մահը։ Մեր անկեղծ ցավակցությունն ենք հայտնում զոհվածների ընտանիքներին»,- նշված է ՀՀ ԱԳՆ-ի X-ի միկրոբլոգում արված հայտարարության մեջ։