Թրամփի վրա կրակողը մահափորձից առաջ հաղորդագրություն է թողել հարթակներից մեկում

Հանրապետական կուսակցությունից ԱՄՆ նախագահի թեկնածու Դոնալդ Թրամփի վրա Փենսիլվանիա նահանգում հանրահավաքի ժամանակ կրակած Թոմաս Մեթյու Քրուքսը մահափորձից առաջ հաղորդագրություն է թողել Steam խաղային հարթակում: Այս մասին հայտնել է Fox News հեռուստաալիքը:

«Steam հարթակում, որտեղ խաղացողները գնում են խաղեր և շփվում, Քրուքսը գրել է. «Հուլիսի 13-ին տեղի կունենա իմ պրեմիերան, հետևեք իրադարձությունների զարգացմանը», - նշել Է հեռուստաալիքը:

Fox News-ի տեղեկություններով՝ ԱՄՆ-ի  գաղտնի ծառայությունը տղամարդու տարօրինակ պահվածքի մասին հաղորդագրություններ է ստացել հրաձգությունից ավելի քան մեկ ժամ առաջ: Քրուքսին կասկածելի են ճանաչել, քանի որ նրա մոտ նկատել են հեռաչափն ու ուսապարկը։

Հիշեցնենք,  որ հուլիսի 13-ին մահափորձ է տեղի ունեցել Դոնալդ Թրամփի դեմ։ Քաղաքական գործչի վրա մի քանի անգամ կրակել են, նրան արյունոտ ականջով տարել են բեմից և հոսպիտալացրել։ Օգնություն ցուցաբերելուց հետո Թրամփին դուրս են գրել հիվանդանոցից։

Հուլիսի 17-ին հաղորդվել էր, որ Հետաքննությունների դաշնային բյուրոն (ՀԴԲ), հարցաքննել է ավելի քան հարյուր մարդու, այդպես էլ չի կարողացել պարզել Փենսիլվանիայում հանրահավաքի ժամանակ ԱՄՆ նախկին նախագահի վրա կրակած Թոմաս Մեթյու Քրուքսի դրդապատճառները: Ամերիկյան հետախուզական գործակալությունները մուտք են գործել հարձակվողի հեռախոս, ստուգել նրա համակարգիչը, տունը և մեքենան, բայց դա չի օգնել հասկանալ, թե որն էր Քրուքսի դրդապատճառը: