ՆԱՏՕ-ում ավելի ու ավելի են վախենում, որ Բայդենը չի կարողանա հաղթել Թրամփին. Politico
Դիվանագետներն ու համաշխարհային առաջնորդները, որոնք պատրաստվում են հաջորդ շաբաթ Վաշինգտոնում կայանալիք ՆԱՏՕ-ի գագաթնաժողովին, մասնավոր զրույցներում խիստ մտահոգություն են հայտնում ԱՄՆ նախագահ Ջո Բայդենի տարիքի, առողջության և 2024 թվականի նախագահական ընտրություններում հաղթելու կարողության վերաբերյալ, գրում է Politico-ն։
Պարբերականը զրուցել է ՆԱՏՕ-ի կամ առաջիկա գագաթնաժողովի հետ կապված 20 մարդկանց հետ, որոնք բանավեճից շատ առաջ արդեն զգուշավոր կասկածներ ունեին Բայդենի շանսերի վերաբերյալ:
Նրանք այժմ տագնապով և մտավախությամբ են արձագանքել Դոնալդ Թրամփի հետ բանավեճում Բայդենի վերջին ելույթին:
«Պետք չէ հանճարեղ լինել տեսնելու՝ որ նախագահը ծեր է։ Մենք վստահ չենք, որ եթե նույնիսկ հաղթի, նա կկարողանա ապրել ևս չորս տարի»,- ասել է ՆԱՏՕ-ի եվրոպական երկրի մի պաշտոնյա։
Մեկ ուրիշ զրուցակից ասել է, որ Բայդենի ելույթը բանավեճում «ցավալի էր դիտել»:
«Մենք բոլորս ցանկանում ենք, որ Բայդենը ստանա երկրորդ ժամկետը, որպեսզի մենք ստիպված չլինենք նորից գործ ունենալ Թրամփի հետ, բայց դա այնքան էլ հուսադրող չէ», - ասել է նա:
Դաշնակիցները մտահոգված են Բայդենի քաղաքական դիրքով և վերընտրվելու հնարավորություններով՝ հաշվի առնելով նրա տարիքը, ասել են երեք դիվանագետները:
«Կարծում եմ, որ նրա համար շատ դժվար կլինի շարունակել իր նախընտրական քարոզարշավը և մնալ իր պաշտոնում», - ասել է ԵՄ բարձրաստիճան դիվանագետներից մեկը՝ հավելելով, որ թեև նրան փոխարինելու մասին որոշումը կախված է Դեմոկրատական կուսակցությունից, սակայն նրանք պետք է «դիտարկեն բոլոր տարբերակները»:
ՆԱՏՕ-ի դաշնակիցների մտահոգությունների թվում է նաև, թե որքան ժամանակ Բայդենը կկարողանա հավաքել ամերիկյան աջակցությունը Եվրոպայի պաշտպանության համար:
«Մենք ավելի շատ ենք խոսում սեփական պաշտպանության մասին, քանի որ, կարծես թե, Թրամփը վերադառնում է», - ասել է ՆԱՏՕ-ի երկրներից մեկի պաշտոնյան:
Բացի այդ, ՆԱՏՕ-ի որոշ դաշնակիցներ դժգոհ Բայդենի ղեկավարությունից, քանի որ շատերը կարծում են, որ նա չափազանց զգուշավոր է եղել զենք տրամադրելու և Ռուսաստանին հարվածելու համար Կիևին թույլտվություն տալու հարցում:
«Արդյո՞ք ԱՄՆ-ն առաջատարն է, թե՞ պարզապես մասնակցում է, ինչպես բոլորը»,- Վաշինգտոնում հարցրել է եվրոպացի բարձրաստիճան դիվանագետներից մեկը։
Այս բողոքները հիմնականում, որպես կանոն, հնչում են դաշինքի Արևելյան Եվրոպայի անդամներից, որոնք ցանկանում են, որ Ուկրաինան սահմանափակումներ չունենա ռազմական օգնության օգտագործման հարցում:
