Իրանում ընտրական հանձնաժողովը որոշել է ևս մեկ անգամ երկարաձգել նախագահական ընտրությունների համար ընտրատեղամասերի աշխատանքը՝ այժմ մինչև տեղական ժամանակով ժամը 22:00-ը, IRNA-ին հայտնել է հանձնաժողովի խոսնակ Մոհսեն Էսլամին:

Սկզբում նախատեսվում էր, որ տեղամասերը կփակվեն տեղական ժամանակով ժամը 18:00-ին, այնուհետև մարդկանց հոսքի պատճառով քվեարկությունը երկու ժամով երկարաձգվեց։

Հունիսի 28-ի առաջին փուլում ընտրատեղամասերը բաց էին մինչև կեսգիշեր:

Երկրորդ փուլ են անցել երկրի խորհրդարանի նախկին պատգամավոր Մասուդ Փեզեշկյանը, ով ստացել է ձայների 42,45%-ը, եւ քաղաքական նպատակահարմարությունը որոշող խորհրդի անդամ Սաիդ Ջալիլին՝ 38,61%-ով։

Թեկնածուները ներկայացնում են իրանական երկու հիմնական քաղաքական շարժումներ։ Ջալիլին պաշտպանում է պահպանողականների շահերը, իսկ Փեզեշկյանը իրանցի ռեֆորմիստների ներկայացուցիչն է։

Իրանում արտահերթ ընտրություններ են անցկացվում մայիսի 20-ին ավիավթարի հետևանքով նախագահ Իբրահիմ Ռաիսիի մահից հետո։