Իրանից հայտնել են, թե ինչ կլինի, եթե երկիրը բախվի սպառնալիքի
Իրանը չի զբաղվում միջուկային զենքի մշակմամբ, բայց կարող է փոխել իր դոկտրինը երկրի գոյությանը սպառնացող վտանգի դեպքում։ Այս մասին հայտարարել է Իրանի գերագույն առաջնորդի խորհրդական և երկրի միջազգային հարաբերությունների ռազմավարական խորհրդի ղեկավար Քամալ Խարազին:
«Եթե Իրանը բախվի էքզիստենցիալ սպառնալիքի, ապա երկիրը ստիպված կլինի փոխել իր դոկտրինը»,- Financial Times թերթին տված հարցազրույցում ասել է Խարազին:
Բացի այդ, նա ընդգծել է, որ եթե Արևմուտքը կրկին պատժամիջոցներ կիրառի, որոնք հանվել են Գործողությունների համատեղ համապարփակ ծրագրին Իրանի միանալուց և իրանական միջուկային ծրագրի սահմանափակումից հետո, Թեհրանից նույնպես լուրջ արձագանք կլինի՝ կապված միջուկային ռազմավարության փոփոխության հետ:
Ընդ որում, Իրանի գերագույն առաջնորդի խորհրդականը նշել է, որ Թեհրանը հանդես չի գալիս միջուկային զենքի ստեղծման օգտին:
