Ստոլտենբերգն արձագանքել է Մոսկվայում միջուկային դոկտրինի հնարավոր փոփոխության մասին քննարկմանը
ՆԱՏՕ-ի գլխավոր քարտուղար Ենս Ստոլտենբերգը հայտարարել է, որ Ռուսաստանի կողմից անմիջական սպառնալիք չի տեսնում։ Ճապոնական Yomiuri թերթին տված հարցազրույցում նա այսպես է արձագանքել Մոսկվայում միջուկային դոկտրինի հնարավոր փոփոխության մասին քննարկմանը:
Ըստ Ստոլտենբերգի՝ հյուսիսատլանտյան դաշինքն իր համար նման անհրաժեշտություն չի տեսնում։
«Անմիջական սպառնալիք չկա. ՆԱՏՕ-ն իր միջուկային ռազմավարությունը վերանայելու անհրաժեշտություն չի տեսնում»,- ասել է Ստոլտենբերգը։
ՆԱՏՕ-ի գլխավոր քարտուղարը նաև մեկնաբանել է ԱՄՆ-ում հնարավոր իշխանափոխությունը. նրա կարծիքով, անկախ ընտրությունների արդյունքներից, Վաշինգտոնը կմնա ՆԱՏՕ-ի «ուժեղ դաշնակիցը»։
Բացի այդ, Ստոլտենբերգն ասել է, որ Չինաստանը ՆԱՏՕ-ի հակառակորդը չէ, սակայն այն «վիճարկում է արժեքները, շահերը և անվտանգությունը»։ ՆԱՏՕ-ի գլխավոր քարտուղարը ՉԺՀ-ին մեղադրել է Թայվանին սպառնալու և Ուկրաինայի հարցում Ռուսաստանի Դաշնությանը աջակցելու համար։
Նրա խոսքով՝ դաշինքը մտադիր է ամրապնդել հարաբերությունները Ավստրալիայի, Հարավային Կորեայի և Ճապոնիայի հետ։
