Ֆրանսիայում ընտրողները մասնակցության նման արդյունք չեն գրանցել 1981 թ.–ից ի վեր. կանխատեսում

Ֆրանսիայում արտահերթ խորհրդարանական ընտրությունների առաջին փուլին ընտրողների մասնակցությունը կանխատեսվում է 69,5 տոկոս: Նման արդյունք ֆրանսիացի ընտրողները չեն գրանցել 1981 թվականից ի վեր։ Այս մասին նշում է BFMTV-ն՝ հղում կատարելով Էլաբեի ընտրական ինստիտուտի գնահատմանը:

Եթե ​​կանխատեսումն իրականանա, հունիսի 30-ին մասնակցությունը զգալիորեն կգերազանցի 2022 թվականի օրենսդրական ընտրությունների առաջին փուլի 47,51 տոկոսը։ Փաստորեն, այն կկրկնի 1981 թվականի օրենսդիր ընտրությունների առաջին փուլի ռեկորդը (70,9%)՝ Ֆրանսուա Միտերանի օրոք։ 1986 թվականի ընտրություններին՝ նրա նախագահության օրոք, մասնակցությունն ավելի մեծ էր (78,5%), սակայն դրանք անցկացվեցին մեկ փուլով: