Այսօր ճակատագրական օր է Իրանի եւ Իրանի ժողովրդի համար. սա երկրում 14-րդ նախագահական ընտրություններն են: Այս մասին Իրանի դեսպանատանը լրագրողների հետ զրույցում նշել է ԻԻՀ արտակարգ և լիազոր դեսպան Մեհդի Սոբհանին:

«Սա ցույց է տալիս, որ Իրանի կառավարությունը հիմնված է Իրանի ժողովրդի քվեի վրա: Այսօր մենք քվեարկում ենք հանուն հզոր Իրանի, հանուն առաջադեմ, երջանիկ ու զարգացած Իրանի: Այսօր առավոտյան ժամը 8-ից սկսվել են ընտրությունները, Հայաստանում գտնվողն իրանցիները արդեն եկել եւ իրենք քվեն են տվել, ինչը նշանակում է, որ Իրանի ապագան իրենց համար կարեւոր է: Հայաստանում երկու տեղամաս է բացվելու եւ մեկ շրջիկ քվեատուփ: Տեղամասերից մեկը լինելու է դեսպանատանը, մյուսը՝ Կապույտ մզկիթում:

Ես համոզված եմ, որ Հայաստանում շատ լրջորեն հետեւում են Իրանի ընտրություններին եւ լիահույս եմ, որ կունենանք այնպիսի արդյունք, որը ի նպաստ կլինի թե Իրանի ժողովրդի, թե Իրան-Հայաստան հարաբերությունների»,-ասել է դեսպանը:

Հարցին, թե արդյոք ընտրությունների արդյունքում Հայաստանի հետ հարաբերությունները որեւէ փոփոխություն կկրեն, նա պատասխանեց. «Մեր քաղաքականությունը Հայաստանի նկատմամբ շատ սկզբունքային է: Այն կառավարությունները, որոնք իշխանության են գալիս, այդ քաղաքականության շրջանակում են գործում: Իրանի սկզբունքային քաղաքականությունը ՀՀ-ի նկատմամբ հնչեցրվել է Իրանի հեղափոխության առաջնորդի կողմից , դա նաեւ ընդգծվել է Իրանում վարչապետի հետ հանդիպման ընթացքում: Մենք հարգում ենք Հայաստանի տարածքային ամբողջականությունը եւ աջակցում ենք դրան: Մենք դեմ ենք միջազգայնորեն ճանաչված սահմանների ցանկացած փոփոխությանը, նաեւ աշխարհաքաղաքական ցանկացած փոփոխությանը:

Այդ սկզբունքային քաղաքականությունը երբեք չի փոխվի՝ անկախ նրանից, որ Իրանում ու Հայաստանում կառավարությունները կարող են փոխվել: Մեզ համար Հայաստանը կարեւոր երկիր է, մեր լավ ու ազնիվ հարեւան է: Երկու երկրների անվտանգությունն ու շահերը շաղկապված են միմյանց: Այս սկզբունքային քաղաքականությունը չի կարող փոխվել կառավարությունների փոփոխությամբ»: