Ի՞նչ քաղաքականությամբ հանդես կգա Չինաստանը. հայտարարություն
Չինաստանի իշխանությունները մտադիր են խաղաղ զարգացման քաղաքականություն վարել և երբեք հեգեմոնի դեր չեն ունենա միջազգային ասպարեզում։ Այս մասին հայտարարել է Չինաստանի նախագահ Սի Ծինփինը։
«Չինաստանը կշարունակի միավորել ուժերը այլ երկրների հետ՝ նպաստելու ընդհանուր ճակատագրով մարդկային հասարակության կառուցմանը»,-ընդգծել է նա՝ ելույթ ունենալով Պեկինում խաղաղ համակեցության հինգ սկզբունքների 70-ամյակին նվիրված համաժողովում։
Սի Ծինփինը հիշեցրել է, որ ՉԺՀ-ն ազգային առանձնահատկություններով արդիականացման քաղաքականություն է վարում և «համակողմանի օգնություն է ցուցաբերում ուժեղ ազգի ձևավորման գործում»։
«Խաղաղ զարգացման ճանապարհով գնալու Չինաստանի վճռականությունը չի փոխվի, մենք երբեք չենք գնա գաղութային թալանի հին ճանապարհով կամ հեգեմոնիայի ծուռ ճանապարհով»,-հավելել է նա:
Սի Ծինփինի խոսքով՝ Պեկինը կշարունակի կառուցողական դեր խաղալ ուկրաինական ճգնաժամում, պաղեստինա-իսրայելական հակամարտության կարգավորման և Կորեական թերակղզու, Իրանի, Մյանմարի և Աֆղանստանի հետ կապված խնդիրների լուծման գործում։
