Երրորդ անգամ երկարաձգվել է Իրանի նախագահական ընտրությունների քվեարկության ժամանակը
Իրանի ընտրական հանձնաժողովը երրորդ անգամ երկարաձգել է նախագահական ընտրությունների քվեարկության ժամը: Իրանցիները կարող են քվեարկել մինչև տեղական ժամանակով ժամը 00:00-ն:
«Նախագահական ընտրությունների քվեարկությունը երկարաձգվել է մինչև ժամը 00:00-ն»,- ասել է Իրանի ընտրական հանձնաժողովի ներկայացուցիչ Մոհսեն Էսլամին IRIB հեռուստաալիքի եթերում։ Քվեարկության ժամը երկարացվել է երկու անգամ՝ սկզբում ժամը 18:00-ից 20:00-ն, ապա տեղական ժամանակով 22:00-ն: Երրորդ երկարաձգումը, ամենայն հավանականությամբ, կլինի վերջինը, որից հետո կսկսվի ձայների հաշվարկը։
Քվեարկել ցանկացողների երկար հերթեր են գոյացել ընտրատեղամասերում շոգ օրվանից հետո։ Օրինակ, Իրանի հարավում ջերմաչափը գերազանցել է Ցելսիուսի 46 աստիճանը։ Երկրի կենտրոնում ջերմաստիճանը պահպանվել է 35 աստիճան Ցելսիուսի սահմաններում։
Իրանում արտահերթ նախագահական ընտրությունները մեկնարկել են հունիսի 28-ին տեղական ժամանակով ժամը 08:00-ին: Դրանք տեղի են ունենում մայիսի 19-ին երկրի նախագահ Էբրահիմ Ռաիսիի մահվան կապակցությամբ։ Նախագահական մրցավազքում չորս քաղաքական գործիչներ են՝ պահպանողականներ Մոհամմադ Բաղեր Ղալիբաֆը, Սաիդ Ջալիլին, Մոստաֆա Փուրմոհամմադին և բարեփոխիչ Մասուդ Պեզեշկիյանը:
