ՏԵՍԱՆՅՈՒԹ․ Անօդաչուներով հարձակում՝ ավիավառելիքի արտադրության ռուսական գործարանի վրա

Հունիսի 27-ի գիշերը անօդաչուները հարձակվել են Ռուսաստանի Տվերի մարզի Ռեդկինսկի փորձարարական գործարանի վրա, որտեղ ավիացիոն վառելիք են արտադրում: Այս մասին գրում են ռուսական լրատվամիջոցները։ Գործարանը գտնվում է Ուկրաինայի սահմանից մոտ 500 կմ հեռավորության վրա։

Ականատեսների խոսքով՝ դրոնները հարվածել են թիրախին։ Հրապարակված որոշ տեսանյութերում երևում է անօդաչու թռչող սարքի թռիչքը երկնքում, իսկ որոշ ժամանակ անց լսվում է պայթյուն:

Ռուսաստանի Պաշտպանության նախարարությունը հայտարարել է, որ տարածաշրջանի վրա չորս ԱԹՍ է խոցել, սակայն չի նշել օբյեկտի խոցման մասին:

Ռեդկինսկի փորձարարական գործարանը Ռուսաստանի քիմիական արդյունաբերության ամենահին ձեռնարկություններից մեկն է: Այնտեղ արտադրում են ապրանքներ ավիացիայի և տիեզերական արդյունաբերության կարիքների համար, մասնավորապես՝ դեցիլին՝ ավիացիոն վառելիք։

Անցյալ տարի կամիկաձե դրոնն արդեն հարձակվել էր այդ ձեռնարկության վրա։ Ուկրաինայի պաշտպանության նախարարության հետախուզության գլխավոր վարչության տվյալներով՝ այն ժամանակ այնտեղ ընկնելու հետևանքով վնասվածքներ են եղել։