Թեհրանի քաղաքապետը հանում է թեկնածությունը Իրանի նախագահի ընտրություններից

Իրանի մայրաքաղաք Թեհրանի քաղաքապետ Ալիռեզա Զաքանին հանել է թեկնածությունը Իրանի նախագահի ընտրություններից՝ հօգուտ երկու այլ պահպանողական թեկնածուների՝ խորհրդարանի խոսնակ Մոհամադ Բաղեր Գալիբաֆի եւ հանրապետության Անվտանգության խորհրդում հոգեւոր առաջնորդի ներկայացուցիչ Սաիդ Ջալիլիի։

«Ես հասա օրենքով սահմանված ժամկետի ամենավերջին, բայց զոհված նախագահ Էբրահիմ Ռաիսիի գծի շարունակումն ավելի կարեւոր է։ Խնդրում եմ Ջալիլիին եւ Գալիբաֆին միավորվել, անպատասխան չթողնել հեղափոխության ուժերի օրինական պահանջները եւ թույլ չտալ, որ Ռոուհանիի երրորդ կառավարություն գոյանա»,- գրել է Զաքանին X-ի իր էջում։

Հասան Ռոուհանին՝ Իրանի նախագահը 2013-2021թթ., պատկանում է բարեփոխիչների թեւին։ Առողջապահության նախկին նախարար Մասուդ Փեզեշքիյանը ընտրություններում միակ թեկնածուն է քաղաքական այդ հոսանքից, որոնք տեղի են ունենալու հունիսի 28-ին։

Թեհրանի՝ թեկնածությունը հանած քաղաքապետը հույս է հայտնել, որ թե՛ Ջալիլին, թե՛ Գալիբաֆը հաղթանակի դեպքում «կանցնեն ճշմարտության եւ ժողովրդի իրավունքների կողմը եւ կընտրեն իրենց գործընկերներին նրանցից, ովքեր, ըստ հոգեւոր առաջնորդ այաթոլա Ալի Խամենեիի, հավատում են հեղափոխության իդեալներին եւ մարդկանց բարեպաշտությանը»։

Ավելի վաղ հայտնել էինք, որ Իրանի փոխնախագահը հանել է թեկնածությունը նախագահական ընտրություններից։