Գալանտը սպառնում է․ Իսրայելը կարող է Լիբանանը վերադարձնել քարե դար
Իսրայելը հայտարարել է, որ չի ցանկանում պատերազմ Լիբանանում, բայց կարող է իր հարևանին «վերադարձնել քարե դար»։ Վաշինգտոնում լրագրողներին հայտնել է Իսրայելի պաշտպանության նախարար Յոավ Գալանտը, գրում է aljazeera.com-ը։
«Մենք պատերազմ չենք ուզում, բայց պատրաստվում ենք յուրաքանչյուր սցենարի: «Հեզբոլլահ»-ը շատ լավ հասկանում է, որ մենք կարող ենք հսկայական վնաս հասցնել Լիբանանին, եթե պատերազմ սկսվի: Իսրայելը կարող է Լիբանանը վերադարձնել քարե դար, բայց մենք չենք ուզում դա անել», - ասել է Գալանտը։
Նշենք, որ երկու երկրի սահմանին իսրայելական ուժերի և լիբանանյան «Հեզբոլլահ» խմբավորման միջև գրեթե ամենօրյա ռեժիմով փոխհրաձգություն է տեղի ունենում հոկտեմբերի 7-ին Գազայի հատվածում իսրայելապաղեստինյան հակամարտության բռնկումից հետո:
Նոր պատերազմի մտավախությունն աճել է այս ամիս, երբ Իսրայելի վարչապետ Բենիամին Նեթանյահուն հայտարարել է, որ Իսրայելը պատրաստվում է «շատ լարված գործողության» Լիբանանի հետ սահմանին։ «Հեզբոլլահ»-ի ղեկավար Հասան Նասրալլան, իր հերթին սպառնացել է «առանց զսպման, առանց կանոնների և սահմանների» պատերազմով՝ Լիբանանի դեմ իսրայելական խոշոր հարձակման դեպքում:
