Բայդենը սպառնալիք է․ հեռուստաբանավեճի նախաշեմին Թրամփը հայտարարություն է արել

ԱՄՆ նախկին նախագահ Դոնալդ Թրամփը երկրի գործող ղեկավար Ջո Բայդենի հետ հինգշաբթի նախատեսված հանրային հեռուստաբանավեճի նախաշեմին իր ընդդիմախոսին Միացյալ Նահանգների գոյության համար սպառնալիք է անվանել:

«Ջո Բայդենը սպառնալիք է ժողովրդավարության, ինչպես նաև մեր երկրի գոյատևման և գոյության համար»,- գրել Է Թրամփը Truth Social սոցիալական ցանցի իր էջում։

Հիշեցնենք՝ հինգշաբթի լույս ուրբաթ գիշերը (Երեւանի ժամանակով առավոտյան ժամը 5-ին) ԱՄՆ-ում կանցկացվի ԱՄՆ ներկայիս նախագահ Ջո Բայդենի և ԱՄՆ նախկին նախագահ Դոնալդ Թրամփի առաջին նախընտրական բանավեճը։ Բանավեճի կազմակերպիչը CNN հեռուստաալիքն է, որը համարվում է դեմոկրատական։

Բանավեճը տեղի կունենա Ատլանտայում և կտևի 90 րոպե։ Մասնակիցները կխոսեն հերթով, միմյանց ընդհատելու հնարավորություն չի լինի։ Գլխավոր թեմաները, ըստ մասնագետների, լինելու են ներքին խնդիրները՝ առաջին հերթին տնտեսությունը, ինչպես նաև միգրացիան։

Հարցումների համաձայն՝ Թրամփն առաջատար է ամերիկացիների համակրանքի համար մղվող պայքարում հեռուստաբանավեճերից առաջ՝ նրան աջակցում է 49%-ը, իսկ Բայդենին՝ 45%-ը։ ԱՄՆ նախագահի ընտրությունները տեղի կունենան 2024 թվականի նոյեմբերի 5-ին։