Երևանն աղետի գոտի է դարձել, գերակշիռ մասը գիշերային ժամերին ջուր չունի։ Երևանի ավագանու անդամ Իզաբելլա Աբգարյանն անդրադարձել է մայրաքաղաքում ջրի որակի ու ջրամատակարարման խնդրին, էլեկտրաէներգիայի տատանումներին։

Երևանի ավագանու անդամ Իզաբելլա Աբգարյանն առաջարկել է քաղաքապետարան հրավիրել ծառայություններ մատուցող ընկերությունների ներկայացուցիչներին՝ քննարկելու հարցերը. «Կներեք, բայց այսպես իրոք անհնար է դարձել․ Երևանը ոչ թե մայրաքաղաքին հարիր ծառայություններ է ստանում, այլ՝ ծայրագավառին»։

Քաղաքապետ Տիգրան Ավինյանն ասաց, որ Աբգարյանի առաջարկն ընդունելի է. «Ջրի որակի հետ կապված բազմաթիվ հարցեր բարձրաձայնվել են դեռ նախորդ տարվանից, մասնավորապես, Էրեբունում։ Այս տարի, իհարկե, այս սեզոնին բարելավվել է ջրի որակը, բայց, այնուամենայնիվ, մնում է վատորակ։ Կան բացատրություններ, հիմնավորումներ, թե ինչու է այդպես, բայց, կարծում եմ, հավելյալ քննարկումն ավագանու մակարդակով չի խանգարի»։

Քաղաքապետն առաջարկեց կազմակերպել նման հանդիպում՝ հրավիրելով նաև ՀԾԿՀ ներկայացուցիչների։