ԵՄ-ն սկսել է Ուկրաինայի հետ Միությանն անդամակցելու բանակցությունները
Երեքշաբթի Լյուքսեմբուրգում տեղի է ունենում նախարարների մակարդակով միջկառավարական համաժողով՝ նվիրված Եվրամիությանը Ուկրաինայի անդամակցության շուրջ բանակցությունների մեկնարկին։
«Բանակցությունները միտված են ապահովելու Ուկրաինայի կողմից Եվրամիության իրավական ձեռքբերումների լիարժեք կիրառմանը»,- համաժողովը բացելով՝ ասել է ԵՄ Խորհրդում Բելգիայի նախագահության արտաքին գործերի նախարար Այա Լաբիբը։
Նա պարզաբանել է, որ իր ելույթը ներկայացնում է Եվրամիության դիրքորոշումը։
Բելգիայի ԱԳՆ ղեկավարը, նշելով բանակցությունների ընթացքում սպասվող խնդիրները, մասնավորապես մատնանշել է դատաիրավական բարեփոխումները, կոռուպցիայի դեմ պայքարը, ազգային փոքրամասնությունների պաշտպանությունը և խտրականության բացառումը։
Եվրոպական խորհրդի նախագահ Շառլ Միշելը երեքշաբթի ողջունել է Ուկրաինայի և Մոլդովայի հետ միջկառավարական համաժողովների անցկացումը, բայց միևնույն ժամանակ ընդգծել է, որ «սա երկար գործընթացի սկիզբ է»։
«Չնայած այսօր մենք նշում ենք կարևոր առաջընթացը, մենք պետք է նաև գիտակցենք, որ ապագա ուղին կպահանջի շարունակական ջանքեր, նվիրվածություն և հետագա նշանակալի բարեփոխումներ», - ասաց Եվրոպական խորհրդի ղեկավարը:
ԵՄ Խորհրդի Բելգիայի նախագահությունն իր ծրագրում հայտնել է, որ եվրոպական կողմը համաժողովում Կիևին կներկայացնի «միասնական կառույց, որը սահմանում է անդամակցության բանակցությունների հիմնական ուղղություններն ու սկզբունքները»։
