ՌԴ-ից մեկնաբանել են Հայաստանի և Ֆրանսիայի միջև CAESAR թնդանոթների ձեռքբերման գործարքը

Հայաստանին 155 միլիմետր տրամաչափի CAESAR ֆրանսիական ինքնագնաց հրետանային կայանքների մատակարարումը կարող է հանգեցնել իրավիճակի վատթարացման։ Այս մասին «ՌԻԱ Նովոստի»- ին հայտնել է Ռուսաստանի փոխարտգործնախարար Միխայիլ Գալուզինը։

Գալուզինը մեկնաբանել է Հայաստանի և Ֆրանսիայի միջև CAESAR թնդանոթների ձեռքբերման գործարքը: Նրա կարծիքով ՝ աշխարհում չկան շրջաններ, որտեղ Արևմուտքի կողմից զենքի մատակարարումները դեպի լավն են տանում։

«Ես չգիտեմ մի տարածաշրջան, որտեղ արևմտյան զենքի մատակարարումները կբարելավեին իրավիճակը», - նշել է փոխարտգործնախարարը: Նա հավելել է, որ պնդումն ամբողջությամբ վերաբերում է Հարավային Կովկասին:

Հիշեցնենք՝ հունիսի 18-ին Ֆրանսիայի պաշտպանության նախարար Սեբաստիան Լեկորնյուն հայտնել էր, որ Փարիզը Հայաստանին կվաճառի 155 միլիմետրանոց CAESAR թնդանոթներ։

Նա ընդգծել է, որ Փարիզը «շարունակում է ամրապնդել պաշտպանական հարաբերությունները» Երևանի հետ։