ԱՄՆ-ն Չինաստանին սպառնացել է պատժամիջոցներով՝ Մոսկվային ռազմական աջակցություն ցուցաբերելու համար

ԱՄՆ պետքարտուղար Էնթոնի Բլինքենը հաջորդ շաբաթ Չինաստան կատարած այցի ժամանակ մտադիր է նախազգուշացնել իր գործընկերներին այն մասին, որ Վաշինգտոնն ու իր դաշնակիցներն ավելի ու ավելի անհանդուրժող են դառնում Պեկինի՝ Մոսկվային տեխնոլոգիաներ մատակարարելուց հրաժարվելու հարցում, գրում է Financial Times-ը՝ հղում անելով իր աղբյուրներին: Թերթի զրուցակիցների խոսքով՝ Միացյալ Նահանգները դիտարկում է չինական ֆինանսական և այլ կազմակերպությունների դեմ պատժամիջոցներ սահմանելու հնարավորությունը: Աղբյուրներից մեկը նշել է, որ Բլինքենի ուղերձը կդառնա «ամենահստակ նախազգուշացումը», որով ԱՄՆ-ը երբևէ դիմել է չինացի պաշտոնյաներին:

Պետքարտուղարի տեղակալ Քուրթ Քեմփբելը հայտարարել է, որ Չինաստանը խաթարում է եվրոպական անվտանգությունը՝ Ռուսաստանին մատակարարելով երկակի նշանակության տեխնոլոգիաներ և միաժամանակ փորձելով ավելի սերտ տնտեսական և քաղաքական կապեր զարգացնել Եվրոպայի հետ: «Մենք եվրոպացի և չինացի զրուցակիցների հետ զրույցներում փորձել ենք ընդգծել, որ այդ երկակի նպատակներն անհամատեղելի են, և որ մենք ցանկանում ենք, որ Չինաստանը մանրակրկիտ մտածի իր հետագա քայլերի մասին», - ասել է նա: Նրա խոսքով՝ Վաշինգտոնը «շատ շիտակ» է արտահայտում իր մտահոգություններն այդ կապակցությամբ և մտադիր է պատասխանատվության ենթարկել Պեկինին:

Բլինկենը Չինաստան կայցելի ապրիլի 24-26-ը: Նրա տեղակալը հստակեցրել է, որ նա Ռուսաստանի հետ համագործակցության հարցը կբարձրացնի ՉԺՀ-ի ԱԳ նախարար Վան իիի հետ հանդիպման ժամանակ: