ԵՄ առաջնորդները գագաթնաժողովում կենտրոնանալու են ոչ թե Ուկրաինայի, այլ Մերձավոր Արևելքի վրա. Politico

Ուկրաինայում և Մերձավոր Արևելքում հակամարտությունները կմրցեն ԵՄ առաջնորդների ուշադրության համար այս շաբաթվա գագաթնաժողովում, գրում է Politico-ն։ Հրատարակության համաձայն՝ Իրանի և Իսրայելի միջև հակամարտությունը, ամենայն հավանականությամբ, ավելի մեծ ուշադրություն կգրավի՝ չնայած տարածաշրջանի վրա ԵՄ-ի աննշան ազդեցությանը։ Ինչպես նշում է Politico-ն, ԵՄ-ն ցանկանում է իրեն դրսևորել որպես համաշխարհային ուժ, որը կարող է ազդել Իսրայելի վարչապետ Բենիամին Նեթանյահուի վրա։

ԵՄ առաջնորդները կփորձեն համոզել Իսրայելին լայնամասշտաբ պատերազմ չսկսել Իրանի դեմ և կոչ կանեն խուսափել Լիբանանում էսկալացիայից։ Որոշ եվրոպական երկրներ կպնդեն նոր հակաիրանական պատժամիջոցների կիրառումը։ «Մենք աշխատում ենք Իրանի դեմ պատժամիջոցներն ուժեղացնելու ուղղությամբ, բայց մենք պետք է իրատես լինենք այն հարցում, թե ինչի կարող ենք հասնել տարածաշրջանում», - Politico-ին ասել է ԵՄ դիվանագետներից մեկը:

Ըստ հրապարակման՝ Ուկրաինայի որոշ դաշնակիցներ Իսրայելի կողմից իրանական հարձակումը հետ մղելուց հետո երկակի ստանդարտներ են հայտարարել և հարցրել, թե ինչու Արևմուտքը չի կարող ստանձնել նույն պարտավորությունները՝ պաշտպանելու Ուկրաինան։ Լիտվայի արտգործնախարար Գաբրիելիուս Լանդսբերգիսը Politico-ի հետ զրույցում նշել է, որ Իրանի հարձակման ժամանակ որոշ արեւմտյան դաշնակիցներ նպաստել են Իսրայելի երկնքի պաշտպանությանը։ «Կիևը շարունակում է նույն պաշտպանությունը խնդրել նույն խմբի երկրներից ավելի քան երկու տարի»,- նշել է նա։

Ինչպես նշում է Politico-ն, հրապարակայնորեն բարձրաստիճան դիվանագետները և ԵՄ պաշտոնյաները վստահեցնում են, որ Ուկրաինան մնում է եվրոպական առաջնորդների հիմնական թեման և չի խեղդվի Իրանի և Իսրայելի միջև հակամարտությամբ: