Զախարովան պատասխանել է Ղրղզստանի դեսպանատան աշխատակցի կնոջ բողոքին

Մոսկվայում Ղրղզստանից դիվանագետի շուրջ ստեղծված իրավիճակի կապակցությամբ Ռուսաստանի ներքին գործերի նախարարության կողմից անցկացվող ստուգումը ցույց է տալիս, որ Ռուսաստանը հարգում է դիվանագիտական հարաբերությունների մասին Վիեննայի կոնվենցիան և դիվանագետների հատուկ կարգավիճակը: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան Telegram ալիքում:

Ավելի վաղ ՌԴ ՆԳՆ պաշտոնական ներկայացուցիչ Իրինա Վոլկը հայտնել էր, որ Մոսկվայում ոստիկանությունը ծառայողական ստուգում է սկսել Ղրղզստանի դեսպանատան աշխատակցի կնոջ նկատմամբ գերատեսչության աշխատակիցների, հնարավոր է, ոչ իրավաչափ գործողությունների համար:

«Եվս մեկ անգամ վերահաստատում ենք մեր երկրի հարգանքը Վիեննայի կոնվենցիայի նկատմամբ և դիվանագիտական կարգավիճակի անխախտելիությունը։ Հետաքննությունը, որի մասին հայտարարել են ՆԳՆ գործընկերները, լրացուցիչ ընդգծում է դա», - գրել Է Զախարովան։

Ինչպես հայտնել են ՌԴ ՆԳՆ-ից, ապրիլի 8-ին Մոսկվայի ոստիկանության աշխատակիցները պրոֆիլակտիկ շրջայցեր են իրականացրել բնակելի հատվածում: Նիժնի Նովգորոդյան փողոցի բնակարաններից մեկի բնակչուհին կտրականապես հրաժարվել է աշխատակիցներին ներկայացնել իր անձը հաստատող որևէ փաստաթուղթ՝ միաժամանակ տեղեկացնելով, որ Ղրղզստանի դեսպանատան աշխատակցի կինն է: Նշվում է, որ կնոջ հետ շփման ընթացքում ոստիկանները բնակարան չեն մտել, բնակիչների վրա ֆիզիկական և հոգեբանական ազդեցություն չեն ունեցել:

Ինչպես երևում է հաղորդագրությունից, ավելի վաղ ոստիկանության տարածքային բաժնի աշխատակիցները տեղեկություններ չունեին տվյալ հասցեում դիվանագիտական աշխատողի ընտանիքի բնակության մասին: Ոստիկանության ծառայողների ոչ իրավաչափ գործողությունների վերաբերյալ բողոք ստանալու կապակցությամբ ներկայումս կատարվում է ծառայողական ստուգում: