Իրանը պատասխանատվություն է կրելու իրավիճակի հետագա սրման գնալու որոշման համար․ Հագարի
Իսրայելական բանակի (IDF) պաշտոնական ներկայացուցիչ Դանիել Հագարին Telegram-ի ալիքում ասել է, որ Իրանը պատասխանատվություն է կրելու հետագա էսկալացիայի գնալու որոշման համար, բանակը պատրաստ է բոլոր սցենարներին։
«Իրանը պատասխանատվություն է կրելու իրավիճակի հետագա սրման գնալու որոշման համար։ ..․Իսրայելի պաշտպանության բանակը պատրաստ է բոլոր սցենարներին և մեր դաշնակիցների հետ միասին անհրաժեշտ քայլեր կձեռնարկի Իսրայելի ժողովրդին պաշտպանելու համար», - հայտարարել է Հագարին բանակի հրապարակած տեսաուղերձում:
Նրա խոսքով՝ Իսրայելը գտնվում է բարձր պատրաստվածության վիճակում և պատրաստ է պատասխանել։
Սիրիայի պաշտպանության նախարարությունն ապրիլի 1-ին հայտնել է Սիրիայի մայրաքաղաք Դամասկոսում Իրանի գլխավոր հյուպատոսության շենքի ուղղությամբ իսրայելական օդուժի ավիահարվածի մասին: Հյուպատոսության շենքում է գտնվել նաև Սիրիայում Իրանի դեսպան Հոսեյն Աքբարիի նստավայրը. վերջինս հարձակման ընթացքում չի տուժել: Սիրիայի պաշտպանական գերատեսչության հայտարարության համաձայն՝ հյուպատոսության շենքը հրթիռային հարվածի հետևանքով ամբողջությամբ ավերվել է:
Իրանի Իսլամական հեղափոխության պահապանների կորպուսի (ԶՈՒ էլիտար ստորաբաժանումներ) տվյալներով ՝ իսրայելական հարվածի հետեւանքով զոհվել է ԻՀՊԿ-ի յոթ սպա, այդ թվում՝ երկու բարձրաստիճան գեներալ - խորհրդականներ՝ Մոհամմադ Ռեզա Զահեդին, Սիրիայում եւ Լիբանանում ԻՀՊԿ-ի «Քուդս» ուժերի հրամանատարը, ինչպես նաեւ նրա տեղակալ, բրիգադային գեներալ Մոհամմադ Հադի Հաջի Ռահիմին:
