Իրավիճակը գտնվում է լուրջ ուշադրության ներքո․ Ժաննա Անդրեասյան

ԿԳՄՍ նախարար Ժաննա Անդրեասյանն անդրադարձել է Տելեգրամում տարածվող դպրոցներին վերաբերող կեղծ լուրերին՝ հայտարարելով, թե դպրոցներում դասապրոցեսն այսօր նորմալ ընթանում է, և ծնողները խուճապի որևէ առիթ չունեն։

«Դպրոցներում ուսումնական պրոցեսը կազմակերպվում է բնականոն, տելեգրամյան ալիքներում կեղծ տեղեկատվությունը իրավապահների կողմից ուսումնասիրվում է, իրավիճակը գտնվում է լուրջ ուշադրության ներքո, այս պահին անհանգստանալու կարիք չեմ տեսնում»,- նշել է նա։

Անդրեասյանի խոսքով՝ դպրոցներից տարհանման որևէ կարիք չկա։

«Դպրոցները հանդիսանում են անվտանգության հատուկ հսկողության տակ գտնվող օբյեկտներ, ես կարծում եմ՝ պետք է վստահել մեր իրավապահ համակարգին․ ամբողջությամբ տիրապետում են իրավիճակին»,- նշել է նախարարը։

Ըստ նրա՝ տարածվող լուսանկարները նույնությամբ կրկնում են մի քանի ամիս առաջ այլ երկրի դպրոցների մասին նմանատիպ տեղեկատվությունը։

«Երբ խոսում ենք հիբրիդային պատերազմի մասին, այն մեզնից հեռու իրականություն չէ»,- նշել է նա։